कॉकरोज जनता पार्टीचे राजधानी दिल्लीतील आंदोलन देशभरात चर्चेचा विषय ठरले होते. या आंदोलनामुळे चर्चेत आलेल्या मोहम्मद इरफान यांनी यूट्यूब चॅनेल सुरू केले होते. इरफान यांच्या चॅनेलला अवघ्या 24 तासांत 70 हजारांहून अधिक सबस्क्राइबर्स मिळाले होते. मात्र आता त्यांचे यूट्यूब चॅनेल अचानक बंद करण्यात आले आहे. यानंतर सोशल मीडियावर मोठी चर्चा सुरू झाली आहे. इरफान यांचे चॅनेल नेमकं का बंद करण्यात आले याबाबत सविस्तर माहिती जाणून घेऊयात.
CJP च्या आंदोलनादरम्यान भारतीय राज्यघटनेची प्रस्तावना वाचल्यामुळे मोहम्मद इरफान हे एका रात्रीत चर्चेत आले होते. यानंतर त्यांनी एक युट्यूब चॅनेल सुरु केले होते. या चॅनेलला अवघ्या 24 तासांत 70 हजारांहून अधिक सबस्क्राइबर्स मिळाले होते. मात्र आता यूट्यूबने सेवा नियमांचे उल्लंघन झाल्याचे कारण देत चॅनेल बंद केले असल्याचे समोर आले आहे. त्यानंतर इंटरनेटवर अनेकांनी इरफान यांचे चॅनेल तातडीने पुन्हा सुरू करण्याची मागणी केली आहे.
मोहम्मद इरफान चर्चेत कसे आले?
मोहम्मद इरफान हे काही दिवसांपूर्वी जंतर-मंतर येथे झालेल्या CJP आंदोलनादरम्यान भारतीय राज्यघटनेची प्रस्तावना वाचल्यामुळे सोशल मीडियावर व्हायरल झाले होते. झोपडपट्टीत राहूनही त्यांनी मजुरांचे प्रश्न, स्वस्त शिक्षण, आरोग्यसेवा आणि लोकशाही हक्कांबाबत स्पष्टपणे आपली भूमिका मांडली होती. त्यांच्या विचारांची सोशल मीडियावर मोठी चर्चा झाली होती. त्यानंतर लोकसभेतील विरोधी पक्षनेते राहुल गांधी यांनी त्यांची भेट घेत त्यांच्या विचारांचे कौतुकही केले होते.
चॅनेल बंद झाल्यानंतर इरफान काय म्हणाले?
समोर आलेल्या माहितीनुसार इरफान यांनी ‘मैं इरफान’ या नावाने यूट्यूब चॅनेल सुरू केले होते. मात्र, केवळ 24 तासांतच त्यांना गुगलच्या सेवा अटींचे उल्लंघन झाल्याचा संदेश मिळाला आणि चॅनेल बंद करण्यात आले आहे. यावर इरफान यांनी X वर पोस्ट करून सांगितले की, मी यूट्यूबच्या सर्व नियमांचे प्रामाणिकपणे पालन केले आहे. मात्र चॅनेल तसेच ही कारवाई ऑटोमेटेड प्रणालीतील तांत्रिक त्रुटीमुळे झाली असण्याची शक्यता आहे. त्यांनी यूट्यूबला आपल्या चॅनेलची फेरतपासणी करून ते लवकरात लवकर पुन्हा सुरू करण्याची विनंती केली आहे.
इंटरनेटवरून मोठा पाठिंबा
इरफान यांचे चॅनेल बंद झाल्यानंतर सोशल मीडियावर अनेकांनी त्यांना पाठिंबा दर्शवला असून, यूट्यूबने त्यांचे खाते तातडीने पुन्हा सुरू करावे, अशी मागणी होत आहे. यासंदर्भात पत्रकार अजित अंजुम यांनीही X वर पोस्ट करत म्हटले की, ‘मजूर वर्गातील एका तरुणाने एका दिवसात 70 हजार सबस्क्राइबर्स मिळवणे ही मोठी कामगिरी आहे.’ तसेच अनेकांनी यूट्यूबने आपली चूक दुरुस्त करावी आणि लोकांचा आवाज दाबू नये, अशी मागणी केली आहे.
